“ڨياسيات العودة المدرسية”3

… خرجنا من حانوت الصبابطي السوق زحمة و أنا مكبش في جبة الوالد نتكعبر وراه..ساعة ساعة نتعطل و ألا يجي حد بيني و بينو نترعب خايف لا تفلت الجبة من يدي …طرف الجبة هو الخيط الوحيد اللي يشدني للوالد في وسط هام الخلق و الزحمة… تفرهدت وقت اللي وقف قدام نصبة مولاها يبيع في الكلاسط…النصبة فوق منها كلاسط و شرليات (cadenas) و كاسة حمام و خلالص و فلايات و الحصن حصين و قشقش أخرين ..خذالي الوالد زوزين كلاسط طوال قرطسهم البياع في طرف جورنان و خلصو الوالد و عاودنا المعبوكة هو يمشي و أنا متعنعكش في جبتو حتى وفات غصرة الخلق وخلطنا لقوس … حاجة عظيمة …قوس و فيه باب مرشق بمسامر نحاس …وقف الوالد و قالي “تعرف شنوة هذا”..”هذا قوس باب بحر ” …فرحت فرحة ما تتوصفش ..موش بالقوس أما كيفاش والدي تفكر و كلمني ..على خاطر من اللي خرجنا من دارنا في نهج بوحميدة ما كلمنيش ..علاقتي بيه كي علاقة الغارق اللي مكبش في خشبة ..أنا هكاكة طرف الجبة هو الخيط اللي شاددني ليه …عاود صوتو خرجني من سرحتي ” سمعت اش قتلك ..هذا قوس باب بحر ..هذا بناوه الحفاصة …” ما نعرفش كيفاش حسيت بالسخانة مكنتني و دموعي زغللت في عيني..قال لي شبيك ..محسور تحب تبول …نبول ! أي نحب نبول …شق بي الكيّاس و دخلني لقهوة مضخمة فيها نساء و رجال و كونتوار موش كي قهوة بن جدو في رحيبة سيدي الجبالي…وصّلني لبيت الراحة و وقف قدام الباب اللي خلاّه مبسّم.. ..أول مرة نشوف ميحاض سوري..احنا عندنا قصرية عربي و نقضيو حاجتنا مقعمزين و هذي كيفاش يڨعمزو عليها …فعلا سؤال حيرني .. و صوت الوالد خرجني من حيرتي ” كملت ” أي سيدي ..خرجت أنا من الميحاض و دوب ما دخل هو.. جبد سلسلة بيدو و الماء عمل شر ..شر …و كي جينا خارجين قالي هذي تتسمى قهوة باباروني ..تحبش تأخذ كاس ليموناضة ؟ كيما تحب سيدي …رجعنا و قعدنا..كيف قعدت ساقي ما يمسوش.. القاعة ..قعدت ندرجح فيهم و نتفرج في الخلق..و السقف و مرايات البلار اللي في الحيوط …صوت الوالد و هو يصفّق و ينادي “ڨرسون ” رجعني من سرحتي ..جاء راجل في يدور طبق و لابس طبلية و حاطط يدو وراه و قال “تفظلوا ” قالو سيدي كاس ليموناضة و كعبة بولو و قهوة …صغير و مخي ياسر يخدم ..علاش الوالد نادى الراجل و قالو “ڨرسون ” …في بالي كلمة خايبة..على خاطر كيف تتعارك جارتنا خالتي “ياسيا ” (آسية،) مع خالتي قمر أختها نسمعها تقوللها “مانيش ڨرسونة عندك ” و تجاوبها خالتي قمر تقوللها “ڨرسونة و نص ” …كيفاش الوالد قال الراجل يا ڨرسون و هو يقول تفظلو… مخي وقف ..ما نعرفش كيفاش شربت الليموناضة و كليت كعبة البولو ..
على فكرة و أنا نحكي لاحضتو مرتين و ألا ثلاثة قلت سيدي و نقصد بيها الوالد ..

( يتبع)
الصورة المرفقة لمن فككنا الحرف معا بالمعهد الصادقي