..الشعب التونسي بسلامة ربي مسلم ولايستسلم ..وهذاكا علاش وين تلقى واحد شادد كرني قدام
جامع يلمد في صدقة لبناء جامع الناس تعطيه وتتصدق ويقلك عندي ربي خير ..وهاذي حاجة باهية
..لكن اليوم في محرس مثلا عندنا تقريبا جامع لكل حومة ..والكثرة هاذي ماهيش باهية ..والجامع
راهو يجمع وكثرة الجوامع تفرق ..شوف انت صلي في اي بلاصة تو تلقى جوامع مايصليوش فيهم
اكثر من خمسة من ناس ..وحاجة أخرى فمة مشكلة متاع قلة الأئمة..الجمعة هاذي مثلا فمة جامع
الناس قعدوا يستناو في الامام باش يجي يصلي بيهم ماجاهم حد صلاو الظهر وروحوا ..وشوف كان
امام يمرض ولا يسافر صعيب باش تعوضوا ..وانا راني نعرف كيف نحكي هكة فمة شكون باش يقلي
تحارب في الاسلام ويكفرني و ويعمل فيها شيخ ..لكن كلمتي باش نكملها .
..الفلوس والمليارات الي مصبوبة في برشا جوامع فمة مؤسسات أخرى اولى بيها ..يا خويا اعملي
صدقة لبناء مكتبة ولا دار ثقافة ولا صدقة لشراء الات نسخ للمدارس ولا اوراق طباعة ..صدقة لبناء
دورات مياه نظيفة لصغيراتنا في المدرسة أو لتغيير مقاعد الدراسة وإصلاح النوافذ االمصطبات
في المعهد ..التلامذة سراولهم تقطعت ..صدقة لصيانة الابواب والمكيفات في السبيطار ولشراء
أسرّة طبية ..بربي زيدوا فكروا في الحكاية وراهي ابواب الخير برشا ومش لازم ماتعمل الخير
كان باش تبني جامع .- منذر رمضان-
